CEBU, Philippines — Ang March edition sa binulan nga Salon De Rose Under 21 rapid chess tournament ipahigayon ugma diha sa Barracks Chess Club sa Robinsons Galleria Cebu.
Sugdan ang aksiyon sa alas-12 sa udto.
Gipahibalo sa mga organizers nga ilang giusab ang pangan sa torneyo ngadto na sa "Salon De Rose Olympian Rapid Chess Tournament" agi'g suporta sa tinguha sa komunidad sa chess nga mailhan ang chess isip usa ka Olympic event.
Gawas nga moabante sa grandfinals, ang mananaog ning 7-round Swiss system competition nga gi-sanction sa National Chess Federation of the Philippines (NCFP) makadawat sab og ganting salapi.
Ang makampiyon mobulsa og P1,500, samtang ang mopahiluna sa ikaduha ngadto sa ikalimang dapit mokabi og P1,000, P700, P500 ug P300.
Ang entry fee nagkantidad og P150.
Alang sa dugang mga detalye, mahimong mokontak ni FIDE Arbiter Marvin Ruelan sa 0926-7352951.