CEBU, Philippines — Naglumpayat sa tumang kalipay ang Yoyi's Pastries & Desserts human makaipsot sa kulbahinam kaayong duwa batok sa Island Hot Wings, 63-62 ug ingon man maangkon ang kampiyonato sa FYA Basketball Tournament Season 22 Pastrano's Special Chicharon Cup 2018 niadtong Domingo diha sa Atillo gym sa Labangon, Cebu City.
Ang Island Hot Wings mao unta ang naglabaw sa nag-unang duwa ka kuwarter, 30-24, apan mibahar ang ilang opensa sa second half hinungdan nga nailog sa Yoyi's Pastries ang labaw, 48-39 human sa tulo ka kuwarter.
Nakaigwalis ang Island Hot Wings, 62-all sa daginutong segundos sa duwa sa free throw ni Daniel Enriquez ug mahatod unta ang duwa ngadto sa overtime, apan si Jao Rabadon nakakubit og foul ug mipasud og usa sa duha niya ka free throws nga maoy nagtuboy kanila ngadto sa himaya. Si Rabadon mihipos og 13 puntos uban ni season Finals MVP ug best player nga si Reyboy Caballes nga miiskor sab og 13 puntos, 21 ka rebounds ug siyam ka assists. Apan si Charles Limbaga maoy topscorer sa kadaogan sa iyang 17 puntos.
Si Caballes mao sab ang nangu sa Mythical Five uban nilang Rabadon, Ryan Villaver, Wendell Rollon ug Daniel Enriquez, kinsa maoy topscorer sa Island Hot Wings sa iyang 18 puntos.
Sa sayo pa, ang Harold's Hotel milubong sa Angel Mary Pawnshop, 79-61 aron pagsakmit sa ikatulong puwesto.
Ang best player nga si Edgemar Jumantoc miiskor og 21 puntos, uban ang 15 ka rebounds ug walo ka assists aron mangu sa Harold's Hotel.
Si Jim-Jim Rara miposa sab og 21 puntos aron pangulohan ang Angel Mary Pawnshop.
PUNTOS MATAG USA
Unang duwa:
HAROLD'S Hotel (79) – Jumantoc 21, Cabañez 20, Ursal 16, Billiones 10, Rollon 6, Celestial 6.
ANGEL Mary (61) – Rara 21, Montillero 16, Villaver 14, Rama 8, D. Endrina 2.
Ikaduhang duwa:
YOYI'S Pastries (63) – Limbaga 17, R. Caballes 13, Rabadon 13, Albarracin 5, S. Aglipa 4, J. Aglipa 3, Martinez 3, Salvador 2, Hanginon 2, Balingcasag 1.
ISLAND Hot Wings (62) – D. Enriquez 18, Laud 14, Patalita 8, Ensong 6, Flores 6, J. Arreglo 4, Arias 2, Baltonado 2, Sy 2.