CEBU, Philippines — Gidaro sa Milwaukee Bucks ang Toronto Raptors, 104-99 sa sangka tali sa mga haring gangis sa NBA Eastern Conference kagahapon didto sa Scotiabank Arena sa Toronto, Canada.
Napilde man tuod, apan ang Raptors mao gihapon ang nagkupot sa labing nindot nga rekord sa liga sa ilang 21-7 nga baraha.
Kini ang ikaduha nilang sagunson nga pilde human sila maparot sa Brooklyn Nets, 106-105 niadtong Sabado. Sa kinatibukan, napilde sila katulo sa miagi nilang upat ka duwa.
Ang duha ka sunod-sunod nga tres ni Malcolm Brogdon maoy nakapalabaw sa Bucks sa hingpit, 100-97 sa nahibiling uno minuto sa aksiyon.
Si Brogdon mitapos uban ang 18 puntos, samtang si Giannis Antetokounmpo mikadlit og 19 puntos ug milangkat sab og 19 ka rebounds.
Miamot si Brook Lopez og 19 puntos alang sa Bucks nga maoy labing unang team nga nakapilde sa Raptors duha ka higayon karon nga season.
Si Serge Ibaka mi-iskor og 22 puntos ug si Kawhi Leonard mitampo og 20 puntos sa Raptors, apan si Kyle Lowry nabokya sa labing unang higayon karon nga season.
Sa laing duwa, sila si Jrue Holiday ug Julius Randle nagkumbinar og 65 puntos sa dihang gibuntog sa New Orleans Pelicans ang Detroit Pistons, 116-108.
Wala sab magpa-alkansi ang San Antonio Spurs nga miresbak sa Utah Jazz sa iskor nga 110-97.
Si DeMar DeRozan miratsada og 26 puntos, samtang si Rudy Gay miamot og 23 puntos ug 15 ka rebounds alang sa Spurs.