CEBU, Philippines — Si LeBron James mipatuasik og 51 puntos aron pangulohan ang Los Angeles Lakers ngadto sa 113-97 nga kadaogan batok sa kanhi niya team nga Miami Heat.
Ang four-time Most Valuable Player nga mi-agak sa Heat ngadto sa upat ka sagunson nga pagtaak sa NBA Finals sa wala pa siya mobalik sa Cleveland Cavaliers niadtong 2014 nagmangtas gikan sa pagsugod sa duwa ug gani mipatak na og 19 puntos sa una kuwarter pa lamang.
Si James milansang og 19 sa 31 niya ka itsa apil na ang unom ka tres.
Wala na masurprisa pa si Heat coach Erik Spoelstra sa gipakitang kabangis ni James nga kanhi niya magduduwa.
Ang Lakers moduwa sunod karong Huwebes didto sa Cleveland nga gigiyahan ni James sa labing una niining kampiyonato niadtong 2015.
Sa laing mga aksiyon, si Damian Lillard mipabuhagay og 40 puntos ug si C.J. McCollom midugang og 25 puntos sa dihang gibugha sa Portland Trail Blazers ang Washington Wizards, 119-109, samtang si Aaron Gordon mitusak og 34 puntos sa dihang gipakaging sa Orlando Magic ang New York Knicks sa iskor nga 131-117. (BANAT NEWS)