CEBU, Philippines — Giusban og pakurat sa Danlag ang twice-to-beat Pulpogan, 72-71, sa 8th Mayor Teresa 'Nene' P. Alegado Cup Fiesta Basketball League didto sa Consolacion.
Si Clark Jugan maoy nangu sa lima ka players nga mikadlit og double figures uban ang 19 puntos sa dihang ang Danlag miangkon sa katungod nga maoy makigsangka sa Tayud sa kampiyonato sa Midgets Category A.
Si Mark Orongan mipupo og 13 puntos, samtang sila si Jonas Chu, Lance De la Cerna, ug Jirus Lupo mitali og 12 puntos matag usa alang sa Danlag.
Sa SK Juniors Category A, si Brevin Keith Padayogdog mikadlit og 19 puntos, samtang sila si Ronald Maraño ug Dexter Panangin nagkumboya og 31 puintos sa dihang gitagak sa Cabangahan ang Tayud, 73-70, aron pagmartsa ngadto sa semifinals batok sa defending champion Pulpogan.
Sa laing aksiyon, si Jerome Valle miposa og walo ka tres sa iyang 28 puntos sa dihang gipakaging sa Poblacion Oriental ang Cabahangan, 91-85, aron pagtikang ngadto sa Inter-Barangay Seniors Category A semifinals.
Ang managsoong Lemuel ug Larry Malagar nagkombinar og 31 puntos, samtang si Jan Haniel Abinales miamot og 12 puntos alang sa Poblacion Oriental, nga magsagubang og malisud nga hagit kay ilang banggaon sa semis mao man ang twice-to-beat defending champion Pulpogan.
Sa open category, si Randy Colonia mipabuhagay og 24 puntos, si Art Pepito midugang og 20 ug si Japet Naingue midonar og 17 puntos sa dihang gibuntog sa Boss KTV ang Branz All Friends, 80-74, aron pagsolo niini sa ikaduhang dapit sa liderato bitbit ang 3-1 record.
Dobleng kalbaryo ang nahiaguman sa Branz All Friends gumikan kay gilabhan man sab sila si David Justin, 65-82.
Sila si Joniel Maglasang, Joseph Cabahug ug Jose Magdadaro nakatigum og 39 puntos sa David Justin nga miinat sa ilang baraha ngadto sa 2-1 samtang ang Branz All Friends natagak ngadto sa 1-2. (BANAT NEWS)