CEBU, Philippines — Gipakita sa Phoenix Fuel Masters nga seryoso
sila nga mahimong usa ka contender sa PBA Governors Cup human nila gipahamtangan sa unang pilde ang Magnolia Hotshots, 95-82, kagabii didto sa Smart Araneta Coliseum.
Human sa sunod-sunod nga kapakyasan sa mga miaging conference, ang Phoenix mihimo karon sa labing nindot nilang sugod diin aduna na silay 5-1 nga baraha ug ikaduha sa standing sunod sa Blackwater Elite (4-0).
Nagbaga ang opensa sa Phoenix sa sayo sa duwa sa pagpangulo nila ni import Eugene Phelps, Calvin Abueva ug RJ Jazul diin gisakmit nila ang 30-19 nga labaw sa first period. Nakabawi hinuon ang Magnolia ug natabla ang iskor 48-48 sa halftime.
Nagdala ra og kwatro puntos nga labaw ang Phoenix pagsulod sa fourth period, apan milihok ang mga shooters sa koponan nga sila si Matthew Wright ug Justin Chua aron inaton ang labaw sa 10 puntos, 90-80, sa katapusang 1:35 sa duwa.
Grabe ang pagbangis ni Phelps kinsa mirehistro og double-double nga 36 puntos ug 20 ka rebounds, samtang sila si Wright ug Chua mitampo og 13 ug 12 puntos matag usa.
Ang import nga si Romeo Travis mihimo og 28 puntos alang sa Hotshots nga natagak sa 2-1 nga baraha.
Ang national team players nga sila si Ian Sangalang ug Jio Jalalon midunol usab og 11 puntos matag usa. (BANAT NEWS)