Pitogo, Danlag abante sa Alegado Cup semis

CEBU, Philippines – Ang Pitogo ug  Danlag mipilde sa ilang  kontra aron pagmartsa ngadto sa semifinals sa 8th Mayor Teresa 'Nene' P. Alegado Fiesta Basketball League didto sa Consolacion.

Si Marco Booker Panta maoy nangu sa upat ka players nga naka-double figures uban ang 20 puntos sa dihang gipalagpot sa Pitogo ang Nangka, 88-73  sa SK Juniors Category A, samtang si Clark Jugan miduslit og 20 puntos sa Danlag nga mipalayas sa Lamac, 68-64 sa Midgets Category A.

Sila si Clark Maglasang ug John Lloyd Pepito nagkumboya og 31 puntos, samtang si Sean Joseph Tero miamot og 14 puntos alang sa Pitogo.

Sa pikas aksiyon, si Jugan gipaluyohan nilang Mark Orongan ug Seatel Yap nga nagkumbinar og 23 puntos sa Danlag nga mikolapso human milabaw, 51-40 sud sa tulo ka kuwarter, apan nakabawi ra sab dayon aron pagpasibat sa Lamac.

Sa uban pang tagakay nga mga duwa, si Michael Alinsug mikimada og 19 puntos sa dihang gilampurnas sa Tayud ang Lamac, 77-63 aron pagpabiling buhi sa  SK Juniors Category A, samtang sila si Marvin Penas, Johniel Tuñacao,   Kim Shannon Capangpangan ug Niddle Earl Capangpangan   miiskor og 10 puntos matag usa sa dihang gitumba sa Polog ang Sacsac, 61-40 sa SK Juniors Category B.

Sa SK Juniors B gihapon, si Silverio Pananganan mipabuto og 27 puntos ug si Ninio Jade Dawa midonar og 25 sa dihang gisikaran sa Panas ang Tilhaong, 86-80.

Sa Inter-Barangay Category B, si Efren Senario milansang og 15 puntos, samtang sila si Aljun Molo ug Charlie Maglasang mitali og 10 puntos matag usa alang sa Garing nga mipukan sa Panas, 71-64.