CEBU, Philippines — Giisip ni British fighter Amir Khan nga usa ka higala si Manny Pacquiao ilabi na kay stablemates sila kaniadto ubos sa poder ni Freddie Roach.
Gani si Khan mibisita dinhi sa Pilipinas pipila ka tuig ang milabay aron tabangan pagpangandam si Pacquiao isip usa sa iyang mga sparring partners alang sa iyang away batok ni Shane Mosley.
Taudtaod na siyang naglungotlungot nga makaengkuwentro ang iyang higala, apan tungod sa pipila ka mga hinungdan, sila si Khan ug Pacquiao wala pa gihapon mag-abot ibabaw sa ring hangtod karon.
Karon nga mihumot og balik ang pangan ni Pacquiao sa welterweight division human patikangkanga niini si Lucas Matthysse niadtong Hulyo 15 didto sa Axiata Arena sa Kuala Lumpur, Malaysia, si Khan mipadayag na sab sa iyang tinguha nga makig-sinukmagay sa Pinoy ring star.
"I've been around training with him for many years, and sometimes friends have to fight,” matud pa ni Khan sa usa ka video interview sa TMZ Sports.
Alang ni Khan, ang silver medalist sa 2004 Olympics ug kanhi lightweight ug super lightweight champion, dili personal ang iyang paghagit ni Pacquiao.
"Sometimes you put your friendship to the side for business," dugang pa niya.
Si Pacquiao mipahibawo nang daan nga moaway pa siya ug modepensa sa WBA welterweight title nga iyang nasakmit gikan ni Matthysse ug si Khan usa ka posibleng kontra.
Samtang si Khan gikatakda nga makigbinukbukay ni Samuel Vargas karong Septiyembre ug kon modaog seguradong tawgon dayon niini ang pangan ni Pacquiao.
"I respect him (Pacquiao), but I know I can beat him," sumala pa ni Khan. (BANAT NEWS)