CEBU, Philippines — Giangkon ni Rain or Shine Elasto Painters star James Yap ang sipyat human sa ilang sakit nga kapildihan sa Game 3 sa ilang best-of-five semis series batok Barangay Ginebra Kings sa PBA Commissioner’s Cup.
Si Yap nahatagan og tsansa nga dad-on ang duwa sa overtime, apan mikagar ang duha niya ka tres.
“Wala eh, kumbaga nasa huli ang pagsisi,” matud pa ni Yap sa Spin.ph. “Sana ginitgit ko muna, binaba ko muna. Pero wala eh, instinct na eh. Sayang dahil straight sana kaso short lang.”
Hinuon ang kanhi MVP misaad nga mamawi karon ilabi na nga nabutang ang Painters sa delikadong sitwasyon.
Ang No.1 seed nga Rain or Shine maglikay nga mapilde pag-usab sa Ginebra sa Game 4 karong gabii didto sa Smart Araneta Coliseum. Ang kapildehan sa Painters mopapas sa ilang paglaum nga makabalik sa PBA finals.
Sa iyang bahin, si Rain or Shine coach Caloy Garcia nagkanayon nga kinahanglan nila nga pahugtan ang depensa ilabi na sa high-scoring import sa Ginebra nga si Justin Brownlee.
Masaligon si Garcia nga makuha nila ang daog karon ug mapugos ang serye ngadto sa usa ka do-or-die Game 5. (BANAT NEWS)