CEBU, Philippines – Human milampos sa una niyang salida sa usa ka international competition pinaagi sa Street League Skateboard (SLS) sa miaging bulan didto sa United Kingdom, ang tadhang Sugboanong skateboarder nga si Margielyn Didal magsagubang na sab og laing lisud nga tahas.
Kini gumikan kay si Didal gikatakda man nga mopakita sa iyang abilidad sa ESPN X-Games karong Hulyo 19-22 didto sa US Bank Stadium sa Minneapolis, Minnesota.
Atol sa prestihiyosong SLS nga giapilan sa labing tang-an nga skaters lukop kalibotan niadtong Mayo 26 didto sa London, England, si Didal mitapos sa ikaupat nga dapit sa eliminasyon ug ikawalo sa final round.
Nindot na kaayo kining dungog ni Didal nga sa pagsalmot pa lang daan mihimo na og kasaysayan isip labing unang representante sa Pilipinas ug bugtong atleta gikan sa Asya nga mikumbati sa maong torneyo.
Karon, tuyo ni Didal ang paghimo og kasikas sa X-Games. Human niini, molahos siya sa Pennsylvania alang sa Skate Training Camp nga kabahin sa iyang preparasyon sa 18th Asian Games nga gikatakda karong Agosto 18 hangtod sa Septiyembre 2 didto sa Palembang, Indonesia.
Ang gipakitang katakus ni Didal usa sa mga hinungdan nganong si Cebu City Mayor Tomas Osmeña nakahukom pagtukod og Skate Park sa South Road Properties.
Dekalibre na man tuod, apan wala makalimot si Didal kun diin siya gikan. Sa dihang sumusulbong pa lamang siya nga talento, usa sa nakapabaid sa iyang abilidad mao ang pagsalmot niya sa mga lokal nga torneyo nga gipasiugdahan ni Jeson L. Guardo sa G-Concepts diha sa Barangay Tisa unom ka tuig na ang milabay.
Mao kini ang hinungdan nganong si Didal mobanat sab sa ikaupat nga leg sa Drave Skate-Up Siomai Festival karong Septiyembre 23 diha sa Tisa gym.