CEBU, Philippines – Ang haring gangis Michael Angelo Coffee & Tea mibatil na sab og daog, ning higayona batok sa Suisa Dribblers, 75-70 sa LABA Basketball Tournament 2018 niadtong Lunes didto sa Co Tiao King gym sa Tabok, Mandaue City.
Ang duha ka sentro nga sila si Francis Palero ug Marcial Marturillas nagkumbinar og 23 puntos aron pangulohan ang balanseng opensa sa Michael Angelo Coffee & Tea, kansang 14 ka players niini ang nakaiskor.
Si Palero mitikdol og 13 puntos, samtang si Marturillas mitimang og 10 puntos sa Michael Angelo Coffee & Tea ni Jeaneth Go Chu.
Ang co-managers nga silang Roy Ermac, Eboy Quiñahan, William Oljol ug Genemar Cena nagkumboya'g 22 puntos sa Michael Angelo nga pabiling nagkupot sa liderato bitbit ang 6-1 nga baraha.
Bugnaw pa kaayo ang sugod sa Michael Angelo Coffee & Tea diin igo lang sila miiskor og otso batok sa 12 puntos nga nahimo sa Suisa Dribblers, apan takulahaw lang nga nangalisngaw ang ilang kainit sa second quarter ug mao na ang nakapabor paghuman sa first half, 32-29. Wala pa matagbaw sa labaw, ila pa kining gibingat ngadto sa 57-42 human sa tulo ka kuwarter.
Miaksiyon og gukod ang Suisa Dribblers sa fourth quarter ubos sa pagpangulo ni Edgar Aligway, apan wala motunhay ang ilang paningkamot kay naabtan sila sa oras.
Si Aligway maoy topscorer sa Suisa Dribblers nga miposa og 16 puntos, gisundan nilang Alexam Amaga ug Ramil Estremos nga nagkuridas og 10 puntos.
Sa laing duwa, ang AC Troopers nakarekober sa fourth quarter aron tipion ang Lesin, 72-61.
Si Boy Saldua maoy nangulo sa opensiba sa AC Troopers nga mirakrak og 14 puntos. Sila si Timmy Cabrera, Opong Englis ug Rex Gonzaga mirapido og 12 puntos matag usa sa AC Troopers ni S/Insp. Dondon Coloscos.
Upat sab ka players ni Gilbert Lesin ang miiskor og double figures sa pagpangulo ni Ronald Llanos nga mikamada og 12 puntos.
Midaog sab ang Butch Surveying pinaagi sa paglubong sa Sebandal sa iskor nga 70-54.
Si Ramie Suson miugbok og 12 puntos aron pangulohan ang Butch Surveying nga pabiling nagsolo sa ikaduhang dapit sa standing sa ilang 5-1 win-loss record.
Nangulo sa Sebandal si Canjo Echavez nga mitikdol og 11 puntos, gisundan ni Emman Pacquiao nga adunay 10 puntos.
Ang liga nahimo pinaagi sa paningkamot sa presidente niining si S/Insp. Dondon Coloscos sa abag nilang Willy Medillo, Macmac Borga, ug Nante Rayla.
PUNTOS MATAG USA
Unang duwa:
AC Troopers (72) – Saldua 14, Cabrera 12, Englis 12, Gonzaga 12, Cabahug 8, Chavez 4, Lavador 2, Borga 2, Coloscos 2, Ecot 2, Oquias 2.
LESIN (61) – Llanos 12, Gonzaga 11, Recto 11, Ocier 10, Lesin 5, Baclay 4, Jugalbot 4, Chavez 2, Magale 2.
Ikaduhang duwa:
MICHAEL Angelo (75) – Palero 13, Marturillas 10, Ouano 9, Madrid 8, Villarosa 8, Quiñahan 7, Ermac 6, Oljol 5, Gonzaga 5, Cena 4, Ornopia 3, Alburo 2, Migallen 2, Angcot 2.
SUISA (70) – Aligway 16, Amaga 10, Estremos 10, Sicad 9, Gonzaga 8, Cabatingan 6, Tangarorang 4, Abadiano 3, D. Suico 2, Mauro 2.
Ikatulong duwa:
BUTCH Surveying (70) – Suson 12, Castillo 10, Cabonillas 9, Son 6, D. Aligway 6, Tantuan 6, Herbieto 5, Pios 4, Alcover 3, Bukiron 3, Federez 3, Cabucos 2.
SEBANDAL (54) – Canjo 11, Pacquiao 10, Bercero 9, Grafe 7, Ubas 6, Canas 4, Cabigas 2, Yares 2, Sebandal 2, Cinco 2.