CEBU, Philippines — Mitingog na ang tag-iya sa Maharlika Pilipinas Basketball League (MPBL) ug Pinoy boxing champion nga si Manny Pacquiao ug gidepensahan niya ang ilang desisyon nga limitahan ang mga Fil-foreign players nga moduwa sa iyang liga.
Nasayran nga nakontrobersiyal ang patakaran sa MPBL dihang mipalag ang mga Fil-foreign players tungod sa nakita nilang diskriminasyon gikan sa batan-ong basketball league sa nasud.
Hinuon, ang Philippine Senator nga si Pacquiao miingon nga angay ra nga limitahan ngadto sa usa ka Fil-foreign player matag koponan ang iyang liga aron mahatagan og higayon ang mga lunsay Pinoy players nga mosidlak. Dili usab siya mosugot nga molapas sa 6-foot-4 ang gitas-on sa mga Fil-foreign aron balanse ang kompetisyon sa MPBL.
Sa pagkakaron, miabot na sa 26 ka koponan ang MPBL nga naglakip sa pambato sa Sugbo nga Cebu City Sharks.