CEBU, Philippines – Ang CRV ug Harold's Hotel mitagak sa tagsa-tagsa nilang kaatbang aron moabante sa semifinals sa FYA Season 21 Summer League 2018 niadtong Huwebes didto sa Vicente Sotto gym sa Punta Princesa, Cebu City.
Ang CRV mipilde sa The Bros, 85-79 aron maangkon ang unang luna sa semis, samtang ang Harold's Hotel mipukan sa Noah, 105-97.
Sila si Dandan Enriquez ug Bryce Tabaña parehong mihabwa og 19 puntos aron mangu sa CRV nga maoy nikontrolar sa tibuok duwa. Si JB Silvano mitampo og 16 puntos, samtang si Emman Reubal miabuno'g 14 puntos sa kadaogan.
Miantog unta og 25 puntos si Raymart Gillagao, apan nakawang lang kay wala makalahutay ang The Bros.
Sila si Dizo Arreglo ug Armand Rubi nagkumboya'g 28 sa napildeng koponan.
Sa laing bahin, sila si Bornong Endrina ug Niko Laborte kuyaw kaayong nakaduwa ug gipangulohan nila ang Harold's Hotel pinaagi sa sa ilang 25 puntos matag usa.
Laing miiskor og double figures mao sila si Nene Billones ug Edmar Jumantoc sa ilang 14 ug 10 puntos.
Ang Noah ni Jobert Barro gipangulohan sab ni Juvinille Enriquez nga mibugha og 24 puntos, gisundan ni Wendel Abella sa iyang 22 puntos ug Dodee de Gracia nga adunay 19 puntos.
PUNTOS MATAG USA
Unang duwa:
CRV (85) – D. Enriquez 19, Tabaña 19, Silvano 16, Reubal 14, Rama 9, Dacayana 5, Hanginon 4.
THE BROS (79) – Gillagao 25, Z. Arreglo 17, Rubi 11, Arreglo 9, Sampilo 7, Baran 6, Demol 2.
Ikaduhang duwa:
HAROLD'S Hotel (105) – Endrina 25, Laborte 25, Billones 14, Jumantoc 10, Dacayana 8, Cabañes 5, Parba 4, Arches 4, B. Medalle 2.
NOAH (97) – J. Enriquez 24, Abella 22, De Gracia 19, Barro 9, Atuel 8, Garcia 4, Baltonado 3, Dechosa 2, Garcia 2.