CEBU, Philippines – Nagpabilin gihapon nga wa'y pilde ang Cebu Province men's volleyball human midaog batok sa University of Southern Philippines Foundation (USPF) sa 2018 Cebu City Mayor's Cup Volleyball Open kagahapon didto sa University of San Carlos gym.
Ang Cebu Province nga gibitoonan og mga kanhi varsity players mipakita sa ilang kadominante human nila giharos sa tulo ka sets ang USPF, 25-22, 26-24, 25-22.
Sa maong kadaogan, ang Cebu Province klaro nang moabante sa semifinals sa ilang 3-0 record.
Sa laing bahin, ang University of San Jose-Recoletos (USJ-R) spikers nakalingkawas batok CebRus sa makutas nga lima ka sets, 25-27, 25-15, 24-26, 25-22, 15-11 ug may pag-asa pa nga moabante sa semis.
Sa women's division, ang USPF misakmit sa luna sa semis human nila gipukan ang South Spikers, 25-16, 25-17, 25-9, samtang ang Mandaue City mipilde sa bisitang Makati Gospel Church-NLCA, 25-12, 25-22, 25-12.