CEBU, Philippines – Ang kadagkoan sa PBA mohimo karon og balaudnon sa pagdili na sa mga koponan nga mo-trade sa ilang No. 1 pick sa Rookie Draft.
Mugnaon kini sa liga aron malikayan ang susamang kontrobersiya niadtong miaging tuig diin gihatag sa Kia Picanto (karon Columbian Dyip) ang ilang katungod nga mokuha sa first pick overall ngadto sa San Miguel Beermen bugti ang mga reserve players.
"The board is already discussing that. There are some governors who are for it," matud pa sa usa ka PBA insider sa Spin.ph.
Giingon nga sa maong balaudnon sa liga, mahimo lang i-trade sa usa ka koponan ilang top pick kun makaduwa na kini og duha ka season.
Ang Beermen misamot karon kalig-on human gikuha ang Fil-German nga si Christian Standhardinger sa miaging draft ug daghan ang mipalag tungod kay daw gibaligya ra kini sa Kia ngadto sa San Miguel.
Ang maong kontrobersiya miresulta usab sa pagkatangtang sa kanhi commissioner nga si Chito Narvasa nga gibanatan og maayo sa pagtugot niya sa maong trade.