CEBU, Philippines — Sakit nga kapildehan ang natagam-taman ni kanhi four-division champion Nonito 'The Filipino Flash' Donaire Jr. kinsa gikulata ni Irish star Carl Frampton atol sa ilang WBO interim featherweight title showdown kagahapon didto sa Belfast.
Ang 35-anyos nga si Donaire kinsa laraw unta nga mabalik sa estado isip usa ka title contender wa musalir batok sa mas paspas ug mas kusgan nga si Frampton kinsa mipaigo og mga solid nga kinumo rasun sa paghubag sa iyang nawng.
Milahutay og 12 rounds si Donaire apan tulo ka mga judges ang mihatag og 117-111 tanan pabor sa Irish slugger. Sa maong kapildehan, nahanaw ang tsansa ni Donaire nga moaway alang sa WBO world title nga kasamtangan gihuptan ni Oscar Valdez.
"Nonito Donaire was dangerous from start to finish. I stuck to the game plan and at times my boxing was beautiful," matud pa ni Frampton kinsa misaka sa record nga 25-1, 14KOs.
Si Donaire kinsa nakatilaw sa ikaupat niyang pilde sa 42 ka away midayeg ni Frampton ug miangkon nga mas kusgan ang Irish kaniya sa timbang nga 122 lbs. "Not taking anything away from Frampton. He is an amazing fighter, smart and a tough fighter," matud pa ni Donaire sa iyang social media account.
Si Donaire makigtigom sa iyang promoter nga RingStar aron sabutan ang sunod lakang nga ilang himuon. (FREEMAN)