Pelicans miharus sa Blazers

CEBU, Philippines — Pulos miiskor og sobra sa 40 puntos ang duha ka pambato sa New Orleans Pelicans nga si Anthony Davis ug Jrue Holiday aron tabangan ilang koponan nga makompleto ang usa ka 'sweep' batok sa Portland Trail Blazers, 131-123, kagahapon didto sa Smoothie King Arena sa New Orleans.

Atubangan sa ilang mga fans, ang Pelicans, nga misud sa Western Conference playoffs sa ikaunom nga dapit, mihimo sa labing una nilang playoff series sweep sa kasaysayan ug mas tam-is kini tungod kay gibiktima nila ang No.3 seed nga Blazers.

Si Davis mirehistro sa iyang career playoff-high nga 47 puntos, samtang si Holiday mitira og 41 puntos nga maoy mipatay sa depensa sa Trail Blazers.

Makapabilib ang gibuhat sa Pelicans nga kalampusan sa first round ilabi na nga daghan ang nagtuo nga di sila musalir sa Blazers tungod usab kay wala ang usa nila ka All-Star nga si DeMarcus Cousins kinsa sa sunod season pa makabalik tungod sa injury.

"A lot of people counted us out after the injury to DeMarcus, so this is amazing," matud pa ni Davis sa Associated Press. "But we have to get ready for the second round."

Gawas nila ni Davis ug Holiday, nahimo usab nga yawi sa kusug nga kampaniya sa Pelicans sa first round ang veteran point guard nga si Rondo kinsa mipakita sa iyang abilidad isip elite point guard. Si Rondo wa kaayo namuntos apan midunol siya og 16 ka assists.

Ang Pelicans nagpaabot na lang sa mudaog sa serye tali sa Golden State Warriors ug San Antonio Spurs. Ang Warriors naglabaw og 3-0 ug laraw usab nga mohimo og sweep sa ilang kaatbang karon.

Didto sa Miami, Florida, ang Philadelphia 76ers misakmit sa 3-1 nga bintaha human nila gipabugnaw ang hometeam nga Heat, 106-102. Mibida ang rookie nga si Ben Simmons kinsa labing unang rookie sukad niadtong tuig 1980 nga nakahimo og triple-double sa playoffs.

Si Simmons mitali og 17 puntos, 13 ka rebounds ug 10 ka assists. Ang Sixers may tsansa nga tapuson ang Heat sa Game 5 didto sa ilang korte.

Didto sa Vivint Smart Home Arena sa Utah, ang Jazz misakmit sa 2-1 nga labaw sa serye human nila gipahilom ang Oklahoma City Thunder, 115-102. Si Ricky Rubio mihimo og triple-double nga 26 puntos, 11 ka rebounds ug 10 ka assists samtang ang rookie nga si Donovan Mitchell midunol og 22 puntos.

Midaog usab ang Minnesota Timberwolves batok sa top seed Houston Rockets, 121-105, aron likayan ang 0-3 nga pagkalubong sa serye. (BANAT NEWS)