CEBU, Philippines – Dili malilong nga si LeBron James ang nag-inusarang mipas-an sa Cleveland Cavaliers ug si coach Tyronn Lue nanghinaut nga mosuporta ang uban niyang mga magduduwa sa Game 3 sa first round playoff series sa NBA karong adlawa.
Ang Cavs nakatabla sa Game 2 human sa 46 puntos ni James, apan si Lue nangandam sa lisud nga duwa karon nga motapon sa balwarte sa Indiana Pacers.
“We need some help for LeBron,” matud pa ni Lue sa NBA.com.
Nakapadugang pa sa problema sa Cavs mao ang pagkaangol sa All-Star nga si Kevin Love nga maoy makatabang unta sa scoring sa Cavs. Makaduwa si Love karon, apan segurado nga limitado ra ang oras niini.
Laing mga posibleng makatampo og dako sa Cavs karon mao sila si Jeff Green, Kyle Korver, JR Smith ug Fil-American nga si Jordan Clarkson.
Ang three-time Eastern Conference champion nga Cavs kinahanglan nga makakuha bisan usa ka daog sa duha ka duwa didto sa Pacers aron dili mameligro.