CEBU, Philippines — Nagsugod na ang enrollment sa ika-18 nga edisyon sa Sirlitz One On One Training Camp, usa sa labing karaan ug gisaligan nga summer basketball clinic sa Sugbo nga mosikad na karong Abril 8 diha sa Yati Elementary School gym sa Liloan, Cebu.
Mapasigarbuhon kaayo ang Sirlitz camp ni UAAP star Paul Desiderio sa University of the Philippines (UP) Fighting Maroons isip usa sa labing banggiitan niining produkto.
Ang Sirlitz training director nga si Edsel Vallena nga hanas sa US ug Korean nga estilo sa pagduwa og basketbol, nagkanayon nga gawas nga bansayon ang ilang mga estudyante sa saktong pamaagi sa pagdribol, pag-itsa, pagpasa ug footwork, ila sab kini nga tudloan og team ug individual defense ug ingon man one on one offensive drills.
“Mao nang gisaligan mi sud sa dul-an duha na ka dekada kay dekalidad nga training ang among ihatag sa mga bata ug segurado gyud nga molambo ang ilang abilidad sa tanan nga aspeto kun moapil sila sa among camp,” matud pa ni Vallena.
Ang training session ipahigayon gikan sa alas-8 sa buntag hangtod sa alas-12 sa udto kun duha ka oras matag age-group gikan sa Lunes hangtod Sabado.
Alang sa dugang mga impormasyon, kadtong interesadong moapil mahimong motawag sa 0906-4683775 o 0943-6068834.