CEBU, Philippines — Wa’y lalis nga si four-time MVP JuneMar Fajardo dako og natabang sa dihang gipalukapa sa San Miguel Beermen ang Barangay Ginebra, 4-1 sa ilang best-of-seven semifinal series aron pagmartsa ngadto sa Philippine Cup finals sa ikaupat nga sunod-sunod nga higayon niadtong Sabado sa gabii.
Ang 6-foot-10 nga Sugboanong higante mi-average og 20.67 points ug 12.67 rebounds aron pagsakmit sa PBA Press Corps Player of the Week. Siya maoy nahimong bida sa Games 4 ug 5 aron pagpabuhi sa ilang kampanya nga molangkat og ‘four-peat’ sa All-Filipino conference.
Human sila gipilde sa Ginebra, 95-87 sa Game 3, si Fajardo mibahog og 14 puntos ug 13 ka rebounds sa dihang miresbak ang Beermen sa Gin Kings, 102-81.
Hingpit nga gitiwasan sa San Miguel ang Ginebra sa Game 5, 100-94 diin ang 28-anyos nga si Fajardo mipatuasik og 25 puntos, siyam ka rebounds ug tulo ka assists.
Bisan og nindot sab og salida silang Marcio Lassiter, Arwind Santos ug Alex Cabagnot, natalbogan sila ni Fajardo alang sa maong pasidungog.
Sa laing bahin, ang San Miguel nagpaabot na lang sa modaog tali sa Magnolia Hotshots ug NLEX Road Warriors sa kaugalingon nilang semifinal series. (BANAT NEWS)