CEBU, Philippines — Bisan wala pa’y opisyal nga kompirmasyon ang iyang sangka sa Hunyo didto sa Malaysia, si Pinoy boxing icon Manny Pacquiao mipahibalo na nga anhi sa Pilipinas ipahigayon ang tibuok niyang training camp.
Mimugna pa og kalibog kun mahitabo ba gyud sa Hunyo ang gianunsiyo ni Pacquiao nga WBA welterweight title fight niya tali ni Argentinian champion Lucas Matthysse human gihimakak sa iyang promoter nga si Top Rank Inc. CEO Bob Arum nga final na ang maong sangka.
Hinuon, ang eight-division world champion mipahibalo na nga sugdan niya iyang training sa Abril didto sa iyang gym sa General Santos City ug didto sa kaulohan.
Si Pacquiao wala na sab mihingalan sa Hall-of-Famer niyang trainer nga si Freddie Roach isip kabahin sa iyang training team. Inay gipanganlan niya sila si Buboy Fernandez, Nonoy Neri ug Roger Fernandez isip iyang mga corner.
Kahinumduman nga sa miagi niyang mga sangka, si Pacquiao adto kanunay mag-training sa Wild Card Gym ni Roach sa Los Angeles.