CEBU, Philippines — Gisubhan dayon og daog ang R.A. Essentials pinaagi sa pagdemolis sa Modern Pharmacy pagsugod sa As-Es Basketball Association of Ramos (BAR) “28th Season Christmas League” niadtong Huwebes didto sa Benjamin Solon Memorial Gym sa Cogon-Ramos, dakbayan sa Sugbo.
Pito ka players ang miiskor og double figures sa balanseng opensa sa R.A. Essentials nga pinangulohan ni Toto Diamante nga mikadlit og 16 puntos.
Labaw og 25 puntos ang R.A. Essentials sa halftime, 60-35, apan nahulga sila human mihiyos ang ilang labaw ngadto na lang sa otso puntos, 78-70 sa third quarter.
Dali hinuon nga nakarekober ang R.A. Essentials human milusad og dakong rally sa fourth period pinaagi sa walo ka sunod-sunod nga fastbreaks ni Jojo Pada ug tulo ka sagunsong 3-point shots ni Diamante.
Sa kinatibuk-an, ang R.A. Essentials miiskor og 40 puntos batok sa 12 puntos sa Modern Pharmacy sa fourth quarter.
Laing nakaiskor og double digits sa R.A. Essentials mao silang Airo Nlaos, Miko Llagas, Reggie Licanda, Rocky Bacalso, Rey Maranio ug Pada.
Tulo ang naka-double figures sa Modern Pharmacy nga sila si Romy Soque nga mipugnit og 18 puntos, gisundan ni Henjie Tablason sa iyang 12 puntos ug Ivan Sabal nga adunay 11 puntos.
Puntos matag usa
R.A. Essentials (118) – Diamante 16, Nalos 14, Llagas 13, Pada 12, Licanda 12, Bacalso 10, Maranio 10, Zamora 8, Millan 8, Sasing 8, Bantug 4, Sabay 3.
Modern Pharmacy (82) – Soque 18, Tablason 12, Sabal 11, Miñoza 9, Espinosa 8, Crisologo 6, Masbate 6, Donaire 5, Piodos 4, Go 3. (BANAT NEWS)