CEBU, Philippines — Si Sylvester Ramirez midaog og duha ka titulo ug ingon man usa ka runner-up finish atol sa penultimate leg sa 2017 Phoenix FDR Philippine Motorcycle Time Attack (Motack) Series didto sa Baywalk sa dakbayan sa Naga.
Nagrepresentar sa Mallari Racing Development-FDR Gudmoto, si Ramirez maoy nanghawod sa novice automatic. Siya sab maoy miposte sa labing paspas nga oras nga milanat lamang og 41.471 segundos.
Si Jade Capacite maoy mipahiluna sa ikaduhang dapit sud sa 42.558 segundos,nagsunod si Nestle Flores sa oras nga 43.503 segundos.
Naghari sab si Ramirez sa Sportsbike class sa oras nga 55.450 segundos. Miokupar sa nagsunod nga duha ka puwesto mao ra sab ang iyang mga kauban nga sila si Van Ricablanca (55.845) ug John Paul Manatad (57.908).
Pakyas hinuon si Ramirez pagbira sa ikatulong korona human siya mapukan sa iyang teammate nga si Rommel Paz sa novice underbone.
Sa iyang bahin, si Chloe Mallari maoy gibayaw nga hara sa ladies open. Iyang gihuman ang lumba sulod lamang sa 50.981 segundos. Si Joan de los Santos maoy mipahiluna sa ikaduhang dapit sa oras nga 51.335 segundos ug ikatulo ang teammate ni Mallari nga si Jannese Lucero sa oras nga 52.666 segundos.
Lain pang mga mananaog mao sila si Rey Lomongo (backbone), Francis Castañeda (beginners automatic) ug John Inoc (beginners underbone). (BANAT NEWS)