CEBU, Philippines — Mobalik na ang aksiyon sa collegiate football sa 2017 Cebu Schools Athletic Foundation, Inc. (CESAFI) season karong adlawa diin ang defending champion University of San Carlos (USC) nagtinguha nga tak-opon ang ilang kampanya sa eliminasyon pinaagi sa usa ka masipang buto sa dihang ilang sangkaon ang University of the Visayas (UV) diha sa Cebu City Sports Center.
Sa dili pa magbugno ang USC ug UV sa alas-3 sa hapon, ang University of Cebu (UC) ug University of San Jose-Recoletos (USJ-R) maoy unang magtige sa ala-1 sa hapon.
Sa kasamtangan, ang USC Golden Booters adunay 11 puntos ug nanginahanglan lamang sila og tabla uban sa UV aron awtomatik na silang makaangkon og luna sa finals.
Angayan hinuon silang magmatngon gumikan kay ang UV Green Booters nga dunay otso puntos naglungot-lungot man sab nga makapanso og finals ticket.
Kulbahinam gyud ang duha ka mga duwa gumikan kay ang USJ-R, UC ug University of Southern Philippines Foundation (USPF) parehong nagkupot og siyete puntos ug pulos pa dunay tsansa nga moabante sa finals. (BANAT NEWS)