CEBU, Philippines — Duha ka adlaw human maputol ang upat ka sagunson nilang pilde, ang Cleveland Cavaliers namumo na sab human gibihag sa Atlanta Hawks, 115-117 sa ligas kaayo nilang duwa sa National Basketball Association kagahapon didto sa Quicken Loans Arena sa Cleveland, Ohio.
Si Dennis Schroeder midagit og 28 puntos aron pangulohan ang Hawks nga miputol sa walo ka sunod-sunod nilang pilde.
Ang Hawks wala na makadaog sukad gipilde ang Dallas Mavericks sa labing una nilang duwa karon nga season niadtong Oktubre 18. Apan ang mas nakapakurat kay gibihag nila ang Cavs bisan og napiangan sila og lima ka players.
Si LeBron James mitapos uban ang 26 puntos ug 13 ka rebounds, apan wala kini igong pasabot nganong wala niya masustinir ang iyang kainit dihang miiskor siya og 57 puntos sa 130-122 nilang kadaogan batok sa Washington Wizards niadtong Sabado.
“That’s a question I cannot answer,” matud pa ni James. “I was ready to go. A lot of the guys were ready to go. I cannot answer that question.”
Sa maong duwa, si Cavs forward Kevin Love gidala sa tambalanan sa ikatulong kuwarter gumikan kay dunay gihambin nga dili maayo sa iyang balatian. Gipagawas ra hinuon dayon siya human madapati og tambal.
Kontrolado sa Hawks ang duwa gikan sa pagsugod, apan ang Cavaliers nakasikit ngadto na lamang sa dos puntos human malubong og 16 puntos sa second half.
Human masipyat si Isaiah Taylor sa duha niya ka free throws sa nahibilin nga 12.1 segundos sa duwa, ang Cavs duna unta’y tsansa nga modaog o dili ba kaha makapuwersa og overtime, apan si Channing Frye nasipyat sa iyang 3-pointer ug wala sab masulod ang follow-up shot ni Dwyane Wade dayong kapupos sa oras.
Si Wade mitapos uban ang 25 puntos alang sa Cavs nga napilde kaunom sa katapusan nilang walo ka duwa.
Sa kinatibuk-an, ang Cavs natagak ngadto sa 4-6, samtang ang Hawks kaduha pa lamang makadaog sulod sa 10 ka kaduwa.
Sa uban pang mga aksiyon, si James Harden mipatuasik og career-high 56 puntos sa dihang gilubong sa Houston Rockets ang Utah Jazz, 137-110, samtang si Jaylen Brown miiskor og 18 puntos ug si Al Horford midugang og 14 puntos ug 10 ka rebounds alang sa Boston Celtics nga mipakaging sa Orlando Magic, 104-88 aron pag-inat sa nagkadina nilang daog ngadto sa walo. (BANAT NEWS)