CEBU, Philippines — Upat ka adlaw human sa iyang kadaogan didto sa South Africa, si Jhack ‘El Capitan’ Tepora sa Omega Gym naglantaw na karon alang sa mas dagko nga hagit sa iyang karera ug kini mao ang pakigsangka sa labing hawod nga boksidor sa featherweight division ug moaway alang sa kalibotanon nga kampiyonato.
Niadtong Sabado didto sa Orient Theatre sa East London, South Africa, si Tepora miiskor og daog pinaagi sa second round knockout ni hometown fighter Lusanda Komanisi aron pagsakmit sa WBO Intercontinental featherweight title.
Si Tepora nagpabiling wa’y pilde sa 21 ka away, diin 16 sa iyang biktima pinaagi sa knockout.
“Napakita na seguro nako nga world title contender ko human ato nga daog. Gusto ko og mas dagko pa nga away labi na world title fight,” matud pa ni Tepora atol sa press conference kagahapon didto sa Abuhan Dos Restaurant. “I want to face the strongest. Gahuwat rako sa moabot nga chance. Andam ko mahimong challenger ni Oscar Valdez (ang WBO champion).”
Si Tepora misulong sa South Africa isip usa ka underdog, apan ang 24-anyos nga boksidor mipakurat sa South African boxing fans dihang mibuhi kini og usa ka brutal nga right hook sa tampihak ni Komanisi. Nalup-og si Komanisi ug wala na kabarog dihang giiphan siya sa reperi.
“Mao to ako first fight gawas sa nasud pero taas akong confidence. Daghan niingon nga dili ko kadaog pero ako gipakita nila akong skills. Salig ko sa akong mga trainers ug sa akong preparasyon ato nga away. Miadto pa ko og Baguio City ug ni-train ko sa Philippine team mao kompiyansa kaayo ko,” dugang pa niya.
Ang trainer ni Tepora nga si Julius Junco nagkanayon nga mas nikusog iyang batos sa 126 pounds division ug salig siya nga maatbangan niya ang mga kusog sa maong dibisyon.
“Moving up weight, I saw the increase in his power. Jhack is also an intelligent fighter. There is still a lot to improve but I think he is now ripe for a shot at the world title soon,” matud pa niya.”I believe in him and we are ready whoever we face next. Featherweight is a stacked division, but I think Jhack belongs there. We are just waiting for the update in the rankings, but WBO officials already assured us that he will be in the top 10.”
Sa iyang bahin, si Omega Sports Promotions International vice president Jerome Calatrava miingon nga dagkong mga tanyag na ang miabot ni Tepora lakip na ang pagpakita og interes sa Top Rank Inc. ni Bob Arum nga papirmahon siya og kontrata.
“We are receiving big offers for Jhack. An official from Top Rank even expressed his interest in signing Jhack,” matud pa ni Calatrava. "For now, we are weighing options but we know that Jhack has captured the attention of the boxing world.” (BANAT NEWS)