CEBU, Philippines - Gilubong sa Borbon ang Cebu City, samtang ang Lilo-an mipilde sa Consolacion aron maoy mag-abot sa finals sa PGBI Summer Basketball League 2017 didto sa V&G Subdivision, Consolacion. Ang Borbon wala’y kukaluoy nga nimasaker sa Cebu City, 72-54 ug ang Lilo-an mitagak sa ilang silingang lungsod Consolacion, 53-44.
Gipangulohan ni Bergado ang kadaogan nga mikadlit og 34 puntos, samtang sila si Sending ug Vanguardia parehong miamot 14 puntos sa Borbon nga maoy midiktar sa tibuok duwa.
Nangulo sab sa Cebu City mao si Gilhang pinaagi sa iyang 27 puntos, gisundan ni Rexon nga adunay 12 puntos.
Sa laing bahin, si Torralba mikamada og 20 puntos aron mangulo sa scoring sa Lilo-an.
Gipangulohan sab ni Mercado ang Consolacion nga mipupo og 16 puntos, gisundan ni Joel Cabahug nga adunay 10 puntos.
Sa laing bahin, ang Labogon midaog human ma-forfeit ang Tolo-tolo.
Ang liga hiniusang proyekto sa PGBI Regional ubos ni founder PGRF Virgilio Boyet ‘Miami Vice’ Bagasala ug PGBI Cebu Province ubos ni founder RMG Domingo ‘Boboy’ Mojado.
Sila si Bagasala ug Mojado mao sab ang chairman ug vice chair.
Ilang miyembro naglakip nilang Franzel Diaz, Cathy Villaflor, Loyn Nepumocino, Jojo Villaflor, Harry Dorado, Cyril Nieves, Horace Angana ug Richard Villaester.
Sa laing bahin, ang PGBI Taekwondo Training Center summer clinic nagpadayon pa gihapon. Gisugdan kini niadtong Abril didto sa V&G subd. sa Consolacion.
Ang maong clinic gidumala ni taekwondo instructor RMG Joeren ‘Joe Canz’ Canucot, 2nd Dan Black Belt.
Puntos Matag Usa
Unang duwa:
BORBON (72) – Bergado 34, Sending 14, Vanguardia 14, Corea 8, Jaguar 2.
CEBU CITY (54) – Gilhang 27, Rexon 12, Atil 9, Pracalla 3, Cerenio 2, Yarag 1.
Ikaduhang duwa:
LILO-AN (53) – Torralba 20, Berandal 8, Angel 7, Giango 5, Jessie 5, Junio 4, Papaya 2, Abog 2.
CONSOLACION (44) – Mercado 16, Cabahug 10, Ragas 9, Ed Lim 4, Romano 2, Mumar 2, Derecho 1. (BANAT NEWS)