CEBU, Philippines - Adunay posibilidad nga moduwa sa Gilas Pilipinas si PBA MVP JuneMar Fajardo sa quarterfinals sa FIBA Asia Cup didto sa Beirut, Lebanon ugma.
Si Fajardo wala makapakita’g aksiyon sa elimination tungod sa injury sa iyang tiil, apan sa miaging adlaw miapil siya sa team practice sa Gilas.
Dako og matabang kon moduwa ang 6-foot-10 nga si Fajardo ilabi na nga adunay gihambin nga minor injuries sila si Chris Standhardinger ug Calvin Abueva.
Ang Gilas miharos og daog sa Group B batok sa China (96-87), Iraq (84-68) ug Qatar (80-74) nga wala si Fajardo, apan si coach Chot Reyes miingon nga mas solido ilang depensa kon anaa ang presensiya sa Cebuano center.
Ang Gilas mangandam sa quarterfinals diin sangkaon nila ang modaog sa South Korea ug Japan. Kon molusot, posible nga ikaharong nila ang laing gikahadlokan nga Iran nga gibitoonan sa higanteng si Hamed Haddadi. (BANAT NEWS)