CEBU, Philippines - Gipahamtangan sa Rain or Shine Elasto Painters sa ikaunom nilang sunod-sunod nga pilde ang Kia Picanto,94-86, sa PBA Governors' Cup kagabii didto sa Mall of Asia Arena.
Ang Kia natagak karon sa 0-6 nga baraha ug hanap na ilang tsansa nga makasulod pa sa playoffs.
Ang Rain or Shine nakabawi human sa ilang duha ka pilde ug misaka sila sa 2-2 nga baraha.
Mirehistro og double-double ang bag-ong import sa Rain or Shine nga si J'Nathan Bullock sa iyang 20 puntos ug 10 ka rebounds. Si Chris Tiu mitampo og 13 puntos, samtang si Beau Belga adunay 12 ug ang bag-ong sakop sa Painters nga si Ed Daquioag adunay otso puntos.
Miabot sa 76-61 ang labaw sa Painters sa sayung bahin sa final period ug wala na gyud kini magukod sa Picanto nga gihamuk usab sa turnovers.
Miiskor og 30 puntos si Markeith Cummings aron suwayan nga mahatagan ang Kia sa labing una nilang daog, apan nakuwangan iyang kusog. Si Reden Celda ug LA Revilla nagkumboya og 26 puntos. (BANAT NEWS)