CEBU, Philippines - Dili malalis nga si JuneMar Fajardo sa San Miguel Beermen ang labing dominanteng bigman sa liga karon, apan si Barangay Ginebra Kings coach Tim Cone nagtuo nga malabwan ra kini sa iyang batos nga si Greg Slaughter.
Si Cone nagkanayon nga hinay-hinay na nga mibalik ang duwa ni Slaughter human sa kapin usa ka season nga pagkawala tungod sa injury.
Matud ni Cone nga misikat si Fajardo tungod sa sunod-sunod nga kalampusan sa Beermen ug kun siya ang pasultion, si Slaughter gihapon ang mas adunay abilidad nga mahimong premyadong sentro sa liga. Midugang si Cone nga sa pagbalik ni Slaughter sa Ginebra, salig siya nga madepensaan nila ang PBA Governors’ Cup title ug kon kini mahitabo, posible nga makuha na usab ni Slaughter ang MVP award. (BANAT NEWS)