CEBU, Philippines - Pakyas ang team Borces pagrekober sa ilang kapildihan dihang gitiwasan sila sa team Ernie, 59-57 sa nagpadayon nilang duwa sa Lamac Basketball Association (LBA) President’s Cup 2017 niadtong Sabado sa gabii didto sa Barangay Lamac open court sa Consolacion.
Ang Borces ni Dr. Jun Borces mao unta ang pirmeng naglabaw sa nag-unang tulo ka kuwarter, gani abante sila og 10 puntos sa fourth period, 45-35. Apan ang labaw gikalingawan og kitkit sa team Ernie nakatabla pa, 53-all sa mga paningkamot nilang Mykel Ernie ug Tayong. Sukad niadto, nagpuli-puli na’g tinusakay og mga puntos ang duha ug nagtabla sa katapusang higayon, 57-all. Nabuak ang panagtabla pinaagi nilang Casiao ug Sungahid nga mipasulod og tag-usa ka free throw alang sa 59-57 nga labaw sa Ernie.
Gihatagan unta og higayon ang Borces nga mokawat sa daog dihang ila ang ball possession sa nahibiling 10 segundos, apan si league commissioner Tata Pellejera nasipyat sa iyang 3-point shot dayong tingog sa final buzzer.
Ang team manager nga si Mykel Ernie maoy nangulo sa kadaogan nga mipabuhagay og 15 puntos uban ang upat ka rebounds, gisundan ni Tayong sa iyang 13 puntos. Ang team Ernie nga gisuportahan sab ni Engr. Roger Lagozar aduna na’y 2-1 record.
Si Gerjam ‘Ygerger’ Armamento mao sab ang topscorer sa Borces nga mitimbre’g 11 puntos, samtang si Ortizano mitimang og 10 puntos, lakip ang duha ka triples, apan nahulog nga wa’y bili ilang iskor kay napukan ang koponan sa ikaduhang higayon sulod sa tulo ka duwa.
Sa laing aksiyon, ang team Dayday miharos sa tulo nila ka duwa sa unang hugna sa eliminasyon pinaagi sa paglubong sa Chocho/Mykel, 80-64.
Ang team Dayday ni Gerard Dayday gipangulohan ni Auguis nga mipatuasik og 12 puntos, samtang si Vequizo nga mikabkab og 10 puntos ug milangkat og lima ka rebounds mao sab ang nangulo sa Chocho/Mykel nilang Engr. Chocho Tan ug Mykel Talledo nga mao na lang ang team nga wala pa’y daog sa tulo ka duwa.
Ang leading scorer nga si Richard Madrid wala na pasudla sa fourth quarter human ang Dayday mitala og 30 puntos nga labaw paghuman sa tulo ka kuwarter. Si Madrid igo lang miiskor og siyete puntos, apan aduna kini unom ka assists ug lima ka rebounds sa Dayday nga gipanglantawan nga maoy mokampiyon ning maong liga ubos sa bendisyon sa presidente nilang si Roy Ermac.
Puntos matag usa
Unang duwa:
DAYDAY (80) – Auguis 12, Duron 9, Madrid 7, Rosales 7, Geverola 7, Norwen 7, Aya 7, Malunjao 6, Quijano 5, T. Dayday 4, R. Lacio 4, Lyle 4, Raul 2.
CHOCHO/MYKEL (64) – Vequizo 10, Abellon 9, Bucabal 9, Tongcos 8, Monreal 8, Chocho 7, Goc-ong 7, J. Ermac 3, A. Lacio3.
Ikaduhang duwa:
ERNIE (59) – Ernie 15, Tayong 13, Sungahid 8, Felix 8, Casiao 5, Aralos 4, Bihag 2, Lagozar 2, Dence 2.
BORCES (57) – Gerjam 11, Ortizano 10, Pellejera 9, R. Ermac 9, Lauza 7, Valle 6, Pitogo 4, Perjes 1. (BANAT NEWS)