CEBU, Philippines – Si Jerwin “Pretty Boy” Ancajas milampos pagdepensa sa iyang IBF super flyweight title human gipakamang ang Hapon niyang challenger nga si Teiru Kinoshita sa ikapitong hugna kagahapong adlawa didto sa Suncorp Stadium sa Brisbane, Australia.
Dominado ni Ancajas ang away gikan sa sinugdanan diin si Kinoshita nagsalimuang pagsagang sa gipauwan niyang mga kumo.
Sa ikaduhang hugna, si Ancajas milandig og mahait nga suntok nga nakaabli og dakong gisi sa taas nga bahin sa tuong mata ni Kinoshita.
Kontrolado kaayo ang away, si Ancajas mibuhi og makusog nga body shot nga maoy nakapatikangkang ni Kinoshita sa hingpit.
Misuway pa unta si Kinoshita og barog apan klaro nga lipong na kini kayo hinungdan nga giundang sa reperi ang aksiyon sa oras nga 1:53 sa ikapitong hugna.
Ang 25-anyos nga si Ancajas nagbitbit na karon og 25-1-1 record uban ang 17KOs samtang si Kinoshita natagak ngadto sa 25-2-1 uban ang 8Kos.
Mao kadto ang ikaduhang malampuson nga pagdepensa ni Ancajas sa IBF belt nga iyang gibira human gipukan ang kanhi Puerto Rican champion nga si McJoe Arroyo niadtong Septiyembre sa miaging tuig didto sa Taguig.
Sa una niyang depensa niadtong Enero didto sa Macau, gipaundang ni Ancajas ang Mehikanong si Jose Alfredo Rodriguez. (EBV) (BANAT NEWS)