SAINT BERNARD, So. Leyte, Philippines – Si Shaquille Imperial mipabuto og 29 puntos, apil niini ang nag-unang 10 puntos sa Southwestern University sa overtime sa dihang ang Cobras mibangon human malubong og 17 puntos sa katapusang kuwarter aron pagpukan sa University of the Visayas Green Lancers, 78-75 pagsugod sa 2017 St. Isidore Fiesta Inter-Collegiate Basketball Invitational Cup kagahapon.
Nakapanimaho na unta og daog ang Lancers human sila naglabaw og daku,59-42 sa nahabilin nga 8:41 sa duwa, apan kalit silang nahugno human si Giovannie Luz naningit pinaagi sa pagbubo og 10 sa iyang 12 puntos sa 21-4 rally nga nakapatabla sa iskor, 63-all.
Human pakyas pagdiga og krusyal nga opensiba ang Lancers sa nahabilin nga 18 segundos sa regulasyon, ang Cobras duna unta’y higayon nga sayong dag-on ang duwa, apan pakyas sila kay wala masulod ang sunod-sunod nga tira nilang Arnel Molina ug Imperial dayong kapupos sa oras hinungdan sa overtime.
Sa dugang singko minutos sa duwa, si Imperial miwadwad og maayo aron pagtuboy sa Cobras ngadto sa 73-67 nga labaw. Sa gihapon miresbak ang Lancers aron pagtabla sa iskor, 75-all, apan dali nga mitubag si Gerald Fernandez aron pagpalabaw og balik sa Cobras, 77-75.
Ang Lancers makahigayon pa unta pagduso og ikaduhang overtime, apan si Tristan Albina nasipyat sa iyang break-away lay up nga gikadismaya og maayo sa kampo sa UV ubos sa pagtimon ni coach Gary Cortes.
Si Molina gi-foul dayon ni Napao human iyang nakuha ang bola sa nahabilin nga 3.9 segundos. Usa lamang ka free throw ang iyang napasud, apan igo na kaayo kini aron silyohan ang daw milagrong kadaugan sa Cobras.
Ang mibalik nilang Liberian import nga si Bassieru Sackor maoy nangu sa Lancers uban sa iyang 13 puntos, samtang sila si CESAFI MVP Rey Suerte ug Balabag nagkumboya’g 23 puntos sa pilderong koponan.
Puntos Matag Usa
SWU (78) – Imperial 29, Luz 12, Fernandez 10, Polican 6, Molina 6, Roncal 5, Ugsang 5, Bayhonan 2.
UV (75) – Sackor 13, Suerte 12, Balabag 11, Segumpan 8, Napao 8, Soliva 6, Testa 2, Albina 2, Adente 1. (BANAT NEWS)