CEBU, Philippines - Hingpit na nga nahilis ang “Big 3” sa Miami Heat nga nagtunol kanila og duha ka kampiyonato ug usa sa finals appearance sud sa upat ka season.
Unang milayas sa poder sa Heat si four-time MVP LeBron James aron motapon og balik sa Cleveland Cavaliers nga iya sab dayon gihatagan sa labing unang NBA title.
Sunod milayas si Dwyane Wade nga nadismaya sa management hinungdan nga gidawat niini ang tanyag aron moduwa sa Chicago Bulls karon nga season.
Ang nahabilin sa ilang “Big 3” nga si Chris Bosh maoy labing uwahi nga mohawa sa kampo sa Heat.
Gikataho sa ESPN kagahapon nga si Bosh ug ang Heat tentatibong nagkasinabot nga mag-iyahay na sila og dalan.
Ang 33-anyos nga si Bosh wala makaduwa sa Heat karon nga season gumikan kay duna kini problema sa iyang dugo, apan nagpabilin kini sa line-up sa Heat.
Si Bosh duna pa’y duha ka tuig nga nahabilin sa lima ka tuig niyang kontrata sa Heat nga mibalor og $118 million. Garantisado siya og $25.3 million sa sunod nga season ug $26.8 million sa 2018-2019 season.
Ang mga abogado sa Heat ug ni Bosh kasamtangan karong nagsabot-sabot aron tukion kun unsay haum ug tukma nga pamaagi aron magkabuwag ang duha ka habig nga wa’y maargabyado. (BANAT NEWS)