CEBU, Philippines - Gipahibalo sa ALA Promotions nga ang IC3 Convention Center (kanhi IEC Pavillion) maoy binyu sa 41st Pinoy Pride boxing series sa Hulyo 8 nga pagabidahan ni knockout artist Mark ‘Magnifico’ Magsayo.
Si Magsayo lab-as pa sa iyang first round knockout nga kadaugan batok ni Tanzanian veteran Issa Nampepeche atol sa Pinoy Pride 40 sa miaging buwan diin si Donnie ‘Ahas’ Nietes midaog sa IBF flyweight title batok ni Komrech Nantapech.
Kini ang unang higayon nga moaway sa main event si Magsayo nga walay pilde sa iyang 16 ka professional fights.
Si ALA Promotions President and CEO mibutyag nga lakip sa maong fight card ang laing hard-hitter sa ALA Gym nga si Jeo ‘Santino’ Santisima nga maoy moaway sa supporting main event.
Unang gigamit atol sa 2016 International Eucharistic Congress, ang IC3 Convention Center dunay 10,000 seating capacity. (BANAT NEWS)