CEBU, Philippines - Ang Sugbuanong si Jason Canoy yano rang mikuha sa saktong timbang agi’g timaan sa iyang kaandam paghagit ni defending champion Mzuvukile Magwaca alang sa World Boxing Federation bantamweight title didto sa Cape Town, South Africa.
Ang 12 ka hugna nga sinukliay og kumo gikatakda sa alas-10 sa gabii adlaw’ng Biyernes didto sa Cape Town (alas-4 sa kaadlawon dinhi sa Pilipinas) mao nang sa inyong pagbasa ning taho lagmit duna na’y resulta.
Si Canoy (26-6-2,19KOs) moaway sa labing unang higayon alang sa world title. Ang batos sa Omega Boxing Gym kaduha pa lang mapilde sud sa tulo ka tuig ug nagpanikad na kining makigsinukliay og kumo ni Magwaca nga wala pa sa’y pilde sa 19 ka away, duha niini tabla uban ang 10KOs.
Mao kini ang unang pagtaak og balik ni Canoy sa langyaw’ng lapyahan sukad siya napilde ni Oleksandr Hryshchuck sa ilang WBA Intercontinental flyweight championship didto sa Donetsk, Ukraine niadtong Agosto 24, 2013.
Samtang si Magwaca wala pa man tuod mapilde, apan wala na kini makaaway pa sukad iyang gipilde si Raul Medina duha ka tuig na ang milabay. (BANAT NEWS)