CEBU, Philippines - Duha ka pambato sa Omega Boxing Gym nga sila si Jhack Tepora ug Christian ‘Bomb’ Araneta mopakita sa ilang katakus sa mas daku nga entablado dihang ang ikaupat nga edisyon sa “Who’s Next?” boxing series sa Marso 18 anha ipahigayon sa Pacific Grand Ballroom sa Waterfront Cebu City Hotel and Casino.
Ang Omega Pro Sports International mipinalisar sa ilang partnership sa Waterfront atol sa paglagda sa memorandum of agreement kagahapon didto sa board room sa business center sa maong hotel. Mitambong sa pinirmahay sila si OPSI President Paulo Pio Castillo, OPSI Vice president Rico Navarro ug hotel general manager Anders Hallden.
Sa labing unang fightcard sa Waterfront, si Tepora (19-0, 14KOs) manalipod sa iyang WBO Oriental junior featherweight championship batok ni Yon Armed (14-7, 6KOs) sa Indonesia sa main event.
“At this point, every fight is important for Jhack and I want him to win impressively until he gets the world title shot,” matud pa ni Castillo.
Kini ang unang title defense ni Tepora sa iyang WBO regional belt nga iyang nadaog pinaagi sa pag-K.O. sa ikalimang round ni Galih Susanto niadtong Disyembre didto sa Mandaue City Cultural and Sports Complex.
“Rank no. 13 ko karon sa WBO, pero akong goal mao nga magsige pa ko og daog aron masulod ko sa top 10 sa ako division,” matud pa ni Tepora. “Wa’y undang akong training tungod kay gusto gyud ko mahimong world title contender.”
Sa supporting bout, ang hard-hitting nga si Araneta (13-0, 11KOs) mosuway pagsakmit sa bakanteng WBO Oriental junior flyweight belt batok sa laing Indonesian nga si Demsi Manufoe (11-6, 9KOs). (BANAT NEWS)