CEBU, Philippines - Miduol sa ilang damgo nga PBA title ang Barangay Ginebra human nila gihubog ang Meralco Bolts,92-81, alang sa 3-2 nga labaw atol sa Game 5 sa ilang best-of-seven finals series sa PBA Governors' Cup kagabii didto sa Smart Araneta Coliseum.
Ang Gin Kings nga katapusang nakatilaw og kampiyonato niadto pang tuig 2008, may kahigayunan nga mutapos sa Bolts karong Miyerkules.
Nagdahunog ang Ginebra sa pagsugod sa duwa dihang sa pagpangulo ni import Justin Brownlee miposte sila og 54-39 nga bintaha sa halftime.
Ginaug sa single digit sa Meralco ang labaw 59-68, sa paningkamot nila ni Allen Durham ug Reynel Hugnatan, apan dali ra usab kini nga gibawi sa Ginebra dihang nanginit sa shooting si veteran Jayjay Helterbrand.
Subling misuway ang Bolts nga makuha ang labaw, apan di sila kahuygo tungod sa depensa sa Kings. Ang sunod-sunod nga tres nila ni Sol Mercado ug Brownlee sa katapusang uno minuto maoy mikandado sa daog sa Meralco, 87-77. (BANAT NEWS)