CEBU, Philippines - Napamatud-a ni Kent Lloyd Gabino nga wa’y imposible nga makab-ot bisan pa sa kalisdanan sa kinabuhi dihang siya ang migawas nga kampiyon sa 3K boys category sa 40th Milo Marathon Cebu leg niadtong Domingo didto sa Cebu City Sports Commission.
Lumupyo sa bukirang barangay sa Balamban, si Gabino nangambisyon nga mahimong runner bisan pa sa kakabus. Gisuportahan siya sa iyang amahan nga si Roy, kinsa nangandoy usab kaniadto nga mahimong sikat nga runner.
Wala hinuon mapakyas si Kent Lloyd tungod kay sa labing una niyang lumba sa kadalanan sa siyudad sa Sugbo, ang 11-anyos miladlad dayon sa iyang tinagoang abilidad sa pagdagan ug tuod man siya ang unang entrante sa 3K boys nga milatas sa finish line nga mioras og 11 minutos ug 17 segundos aron makuha ang labing una niyang tropeyo sa Milo Marathon.
“Naluoy ko sa akong anak pag-una kay nakita nako nga usa man siya sa mga pinakagamay dihang naa pa sila sa starting line,” matud pa sa amahan nga si Roy sa Banat News. “Kugihan gyud siya mo-train ug nakita gyud nako nga ganahan kaayo siya mag- runner.”
Gihimo usab ni Roy ang tanan aron makasalmot iyang anak sa tinuig nga Milo diin miabot sa punto nga mipalit sila og sapatos gikan sa usa ka ‘ukay-ukay’ aron maoy gamiton sa iyang anak.
Tungod kay wala siya nasuhito sa rota sa lumba, si Kent Lloyd nasaag pa paingon sa finish line, apan bisan pa niini siya gihapon ang unang miabot pamatuod sa daku niyang abante atol sa lumba.
“Mao man to ako una nga pagdagan diri sa Milo kay sa una igo ra man ko makadungog ani ug makakita sa newspaper. Gusto gyud nako nga modagan sa Milo ug nalipay ko nga nahitabo ni ug nidaog pa gyud ko,” matud pa sa batan-ong Gabino.
Usa sa nakatampo og daku sa kalampusan ni Kent Lloyd mao ang runner ug triathlete nga si Dr. Marivic Tan, kinsa maoy nakadiskubre sa batang runner dihang nag-ensayo siya sa Balamban.
“Bilib gyud ko niya and nakita nako ang iyang hilig sa lumba kay mosabay man ni siya namo kanang modagan mi didto sa Balamban. Na-inspire ko aning bataa maong ako siyang gitabangan nga makaapil sa Milo,” saysay pa ni Tan. “Aside sa cash prize nga iyang makuha kun modaog pa siya sa mga race nga iyang apilan, nag-hope ko nga matabangan siya and eventually makakuha siya og scholarship para usab makatabang sa iyang pag-eskuwela ilabi na sa college unya,” dugang ni Tan. (BANAT NEWS)