CEBU, Philippines - Ang Cebu Schools Athletic Foundation, Inc. (CESAFI) misuspenso sa tulo niini ka reperi gumikan sa ilang kapakyasan paghatag og saktong mga tawag atol sa duwa tali sa University of Cebu Junior Webmasters ug University of Southern Philippines Foundation Baby Panthers niadtong Domingo didto sa Cebu Coliseum.
Gipahamtangan og tagtulo ka duwa nga suspensiyon mao sila si reperi Jun Babanto, Reynaldo Barriga ug Edison Sabellano.
“They are suspended for three games for not giving their authority in officiating the game of high school between UC and USPF,” matud pa ni CESAFI commissioner Felix ‘Boy’ O. Tiukinhoy Jr. sa usa ka opisyal nga pamahayag nga gipadala pinaagi sa text message.
Sa linain nga interbiyu, ang deputy ni Tiukinhoy nga si Danny Duran, mipasabot nga ang aksiyon nga ilang gihimo gituyo aron pagdisiplina sa mga reperi gumikan kay pakyas kini pagkontrolar sa maong duwa.
Sa wala pa moposte og 77-49 nga demolisyon, ang Junior Webmasters nakigbatok sa pisikal kaayong duwa sa Baby Panthers. Ang resulta, duha ka USPF players nga sila si Christopher Erick Isabelo ug Kyle Niño Ochavo ang na-ejected gumikan sa duha ka sunod-sunod nga unsportsmanlike fouls. Gawas sa awtomatik nga suspensiyon ug P5,000 nga multa, mohimo sab sila og upat ka oras nga community service ubos sa superbisyon sa Cebu City Sports Commission sa dili pa sila tugotan nga makaduwa og balik.
Usa ka CESAFI insider nga dili magpaila kay wala siya’y katungod nga mosulti bahin sa liga ang misugilon sa Banat News nga daghan kaayo’g sipyat ang reperi. Matud pa niya nga dili unta mamahimong tensiyonado ang duwa kun ugaling sakto pa ang ilang mga tawag. (BANAT NEWS)