CEBU, Philippines - Dakung kalampusan ang nakab-ot sa Gilas Pilipinas men’s national basketball team human sila mikatkat sa ika-27 nga puwesto sa FIBA World Rankings.
Sa labing uwahing gipagawas nga ranking, ang Pilipinas misaka og usa ka ang-ang gikan sa ika-28 ug mas taas pa sila sa kanhi European powerhouse team nga Germany.
Ang paglambo nahitabo human sa kampanya sa Gilas sa 2015 FIBA Asia Championship ug FIBA Olympic qualifying tournament sayo ning buwana. Ang Gilas misakmit og silver medal sa miaging FIBA Asia didto sa China, apan pakyas sila pagsakmit og luna sa Olympics sa qualifiers nga gipahigayon didto sa MOA Arena.
Bisan pa og wala sila midaog sa Olympic qualifiers sa duha nila ka duwa batok sa France ug New Zealand, ang Gilas misaka tungod sa ilang kaaktibo sa mga internasyonal nga mga torneyo.
Gawas sa Germany, ang Gilas mas milabaw pa usab sa ilang Asian rival nga Jordan nga milublob sa ika-28 nga dapit. Nag-unang Asian team sa FIBA ranking mao ang China sa ika-14, samtang ang Iran nagsunod sa ika-25 nga luna.
Sama sa gihapon, ang Team USA nga misakmit sa gold medal sa Rio Olympics pabiling hari sa ranking gisundan sa Spain, Serbia, France ug Lithuania. (BANAT PALARO)