CEBU, Philippines - Human sa malampusong pagpahigayon sa una nilang kalihukan, niadtong Marso, ang Omega Pro Sports International milusad sa duha nila ka events nga mohatag og kahigayonan sa mga batan-ong boxing prospects aron ipadayon ilang damgo nga mamahimong world champion.
Ang unang edisyon pagaulohan og “Uptown Rumble” nga gitakda sa Hunyo 11 didto sa One Mango ug sundan sa “Who’s Next? Pro Boxing Series” sa Hulyo 10 diha sa Robinsons Galleria Cebu.
“Aside from the “Who’s Next? Pro Boxing Series”, we decided to put up another boxing event because we have a lot of fighters and we want to keep them busy,” matud pa ni Omega Pro Sports International Vice President Chad E. Cañares sa press conference kagahapon didto sa Manggahan Grill and Resto Bar.
Sa main event sa “Uptown Rumble”, mobida ang kanhi Philippine super flyweight champion nga si Jason Canoy (24-6, 18KOs) diin iyang harungon si Margarito Moya (9-2, 3KOs) sa Rex ‘Wakee’ Salud Stable.
Laing Omega boxers nga mopakita og aksiyon naglakip nila ni Jerry Castroverde, Jared Payao, Salatiel Amit, Ar-ar Borbon, Oliver Genecera ug Ponciano Rimandiman.
Samtang sa “Who’s Next? Pro Boxing Series,” si undefeated WBO Asia Pacific Youth super bantamweight champion Jhack ‘Golden Boy’ Tepora (21-0, 12KOs) modepensa sa iyang titulo sa labing unang higayon batok sa wala pa nganli nga langyaw’ng kaatbang.
Moaway sab sila si WBF Asia-Pacific bantamweight champion Kenny Demecillo ug Philippine light flyweight titlist Christian Araneta. (BANAT NEWS)