CEBU, Philippines - Nalakip si Draymond Green ug ang sweet shooting swingman nga si Klay Thompson isip reserves sa 2016 NBA All-Star Game.
Silang Green ug Thompson makig-uban sa ilang teammate sa Golden State Warriors nga si Stephen Curry kinsa nalakip sa West starters.
Lakip sa naapil isip reserve mao si Jimmy Butler sa Chicago Bulls.
Ang mga starters kinsa gibotaran sa mga fans ginganlan na sayo ning buwana ug ang pagbutyag sa mga reserves kagahapon mao na’y mokompleto sa rosters sa moduwa sa All-Star Game karong Pebrero 14 didto sa Toronto, Canada.
Gawas kanilang Green ug Thompson, ang coach sa West nga si Gregg Popovich mipili nilang Houston Rockets guard James Harden, San Antonio Spurs forward LaMarcus Aldridge, Los Angeles Clippers guard Chris Paul, New Orleans Pelicans forward Anthony Davis ug Sacramento Kings center DeMarcus Cousins.
Ang East ubos ni coach Tyronn Lue mibutyag sab sa ilang reserves nga silang Detroit Pistons center Andre Drummond, Butler, Atlanta Hawks forward Paul Millsap, Miami Heat forward Chris Bosh, Washington Wizards guard John Wall, Boston Celtics guard Isaiah Thomas ug Toronto Raptors guard DeMar DeRozan.
Ang mga starters sa East mao silang Dwyane Wade (Miami), LeBron James (Cleveland), Kyle Lowry (Toronto), Carmelo Anthony (New York) ug Paul George (Indiana).
Sa West nga kauban ni Curry mao silang Kobe Bryant (L.A. Lakers), Russell Westbrook ug Kevin Durant (Oklahoma) ug Kawhi Leonard (San Antonio). (BANAT PALARO)