Makasaysayanong tuig
(Banat) - December 30, 2015 - 9:00am

Sud sa dul-an duha na ka dekada nakong pagsulat og mga balita kabahin sa paugnat sa kusog, daghan na ko og mga kasinatian nga mipatak sa akong dughan ug dili nako mahikalimtan. Apan maisip nako nga karon maoy usa sa labing makasaysayanon nakong tuig sa buhat isip sports journalist.

Bisan tuod og naputos sa kontrobersiya ug usa ka dakung palpak sa mata sa kinabag-an ang 'Fight of the Century', mapasigarbuhon ko nga nakasaksi sa superfight nilang Manny Pacquiao ug Floyd Mayweather  Jr. niadtong Mayo 3 didto sa MGM Grand Garden Arena sa Las Vegas, Nevada.

Maski ako wala makauyon sa resulta sa maong giatngan nga engkuwentro nga para nako kulang ra kaayo sa aksiyon, apan dili malimod nga kabahin na kini sa kasaysayan isip labing daku nga away sa boksing kun sa kita, presyo sa mga tiket ug premyo sa duha ka boksidor ang hisgutan.

Rekord sab gani ang mikober nga sakop sa media tibuok kalibotan nga miabot og kapin sa duha ka libo. Sa maong gidaghanon, pipila ra ang nahatagan og special ringside accreditation ug nabuligan ta’s maayong palad kay usa kita niana. Pipila lamang ka tikang ang akong gilay-on gikan sa ring ug dungog na kana para nako isip usa ka Sugbuanong tigbalita.

Abi nako’g mao na kadto ang katapusan  nakong biyahe sa Amerika karong tuiga, dili pa diay. Niadtong Oktubre 17, nahisama ko sa piniling miyembro sa Pinoy’ng sports media nga mikober sa labing unang Pinoy Pride boxing card sa ALA Promotions ug ABS-CBN Sports didto sa US nga gipahigayon didto sa StubHub Center sa Carson City, California.

Isip kabahin sa laing makasaysayanong event sa Philippine sports, mura’g gibayaw ko sa tumang himaya. Talagsa ra man gud o di ba gani sulagma ra kaayo nga mahatagan ta og kahigayonan nga makasaksi og duha ka higanteng kalihukan sa isports nga didto pa gyud sa Amerika nahitabo.

Nganong naghisgot ko niining tanan? Dili para sa akong kaugalingon kun dili para sa katibuk-an sa tinguha nga makapaambit og pagtulon-an sa atong kinabuhi, mahinungdanon nga mobalik lantaw kita sa atong kagahapon nga dunay mapasalamatong kasingkasing.

Sa kanunay, kita mapasalamaton sa Kahitas-an sa tanang mga grasya ug kamaayohan nga atong natagamtaman sa matag adlaw. Mao kini ang labing maayo natong buhaton karon nga hapit na mapupos ang kahayag sa kandila nga maoy midan-ag natong tanan ning tuig 2015.

Ning puntoha, kita maglantaw sa nangaging hitabo sa atong kinabuhi inubanan sa pamalandong ug atong sugaton ang bag-ong tuig bitbit ang tumang pagkamalaumon.

Sa suki namong tigbasa og Banat News, salamat sa wa’y puas ninyong suporta ug kaninyong tanan, akong idalit ang mainiton nakong pagtimbaya alang sa usa ka Malipayon ug Mabulukon nga Bag-ong Tuig!

AMERIKA ANG BANAT NEWS CARSON CITY FIGHT OF THE CENTURY FLOYD MAYWEATHER GRAND GARDEN ARENA LAS VEGAS MANNY PACQUIAO NGA NIADTONG OKTUBRE
Philstar
  • Latest
Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

SIGN IN
or sign in with