CEBU, Philippines - Mipataroy og daghang 3-pointers ang Nippon Sports Science University (NSSU) sa Japan aron moiskor dayon og daog batok sa host University of Cebu (UC) Webmasters, 90-83 sa unang adlaw sa 1st Asian Pacific University Games (APUG) basketball event kagahapon didto sa USC main gym sa dan Sanciangko, dakbayan sa Sugbo.
Ang Japanese cagers mihimo’g 12 ka three-pointers, samtang ang Webmasters ni coach Atty. Kenneth Sesante nakapasud lang og upat.
Tulo ka players sa Japan ang miiskor og double figures pinangulohan ni Ebata Kosuke, kinsa mihagdaw og 17 puntos, gisundan ni Odagiri Keisuke sa iyang 13 puntos ug Oshito Yusako nga adunay10 puntos.
Ang Japan nikontrol sa duwa ug milansang sa labing daku nilang labaw nga 12, 82-70 sa nahabiling 3:16 sa duwa sa basket ni Yusuke.
Si John Jabello maoy nangu sa Webmasters sa iyang 21 puntos, samtang si Garciano Puerto Jr. midugang og 18 puntos.
Ang rookie guard nga si Julian Delatar, kinsa mipakita sa iyang katakus sa assists ug depensa mitampo og 16 puntos.