CEBU, Philippines - Ang Cebu Province mihakot og duha ka golds, samtang ang Cebu City ug Mandaue City nakakuha og tagsa ka bulawan sa boxing event sa bag-o lang natapos nga 2015 Philippine National Games-Batang Pinoy National Championships didto sa Cebu Coliseum.
Si Alexander Bonita mitunol og gold sa Cebu Province human midaog pinaagi sa ‘unanimous decision’ batok ni Rodel Gamos sa Bago City sa kids vacuum division final.
Ang kauban ni Bonita nga si Berland Robles midaog sab batok ni Ar-jay Recopelacion sa General Santos City pinaagi sa ‘split decision’ aron paghatag sa Cebu Province sa ikaduha niining bulawan ubos sa pinweight class.
Ang Team Cebu City naka-gold kortesiya ni Eduardo Jimenez, nga wala paningta gumikan kay ang iyang kontra nga si John Mark Miranda wala mopakita sa ilang final match sa kids powderweight category.
Mihakot sab og bulawan ang Mandaue human midaog si Dominique Casanares batok ni Kim Delmar Macaangga sa GenSan ubos sa light flyweight division. (BANAT PALARO)