CEBU, Philippines – Ang November edition sa binulan nga torneyo sa Cebu Executives and Professionals Chess Association (CEPCA) gitakda karong Domingo, alas-2 sa hapon diha sa Handuraw Cafe sa Gorordo Avenue, Cebu City.
Si CEPCA sports committee chairman Jun Olis nagkanayon nga ning higayona, duha ka qualifiers ang ilang kuhaon aron makumpleto ang ‘Magic 12’ nga maoy magsangka sa grand finals karong Disyembre.
Apil sa listahan sa mga ni-qualify na alang sa gitawag nga ‘Battle of Champions’ mao sila si two-time grand champion Jimmy Ty Jr., Rey Flores, Arnold Cadiz, Peterson Sia, Tony Cabibil, Ross Yamyamin, Amado Olea Jr., Zilverstein Torres, Carlo Maraat ug Jojo Muralla sa Group A. Naglangkob sa sayong mga finalists sa Group B mao sila si Regelito Hortelano, Ruel Hortelano, Elmer Odango, Jojo Paredes, Jun Kidlat, current club president Jerry Maratas, Jessa Balbona, Edwin Cablao, Romy Pialan ug Michael Ventulan.
Sa laing bahin, si Olis mipahibawo nga ang CEPCA mopahigayon og espesyal nga Board meeting karong Sabado sa udto diha sa Chika-an Restaurant sa Parkmall. Gawas sa ilang grand finals, pagahisgutan sab sa grupo ang pagpili og bag-ong opisyales, ang ilang umaabot nga Christmas party ug ingon man ang pagmugna sa CEPCA magazine agi’g pahinungod sa ika-25 nilang anibersaryo. (BANAT NEWS)