CEBU, Philippines – Ang ika-25 nga edisyon sa Cebu City Olympics mosikad pinaagi sa lain na sab nga bonggang seremonyas karong hapon diha sa Cebu City Sports Center.
Modugang og kahayag sa maong kalihukan mao ang pagpasidungog sa pipila ka mga produkto sa City Olympics nga nakahimo og talagsaong marka ug nakakab-ot og tumang kadungganan sa tagsa-tagsa nila ka mga events.
Atngan sab ang paghagpat sa Mr. and Miss City Olympics sa elementary ug secondary division ug ingon man ang field demonstration.
Pipila ka duwa sa football, basketball ug volleyball ang kumbatihan karon, apan halos tanan nga events ugma pa sugdan ang aksiyon.
Ang arnis, archery, boxing, swimming ug taekwondo napahigayon na niadto pang miaging semana gumikan kay ang mga atleta nga apil niini naglangkob man sab sa Team Cebu City nga miasdang sa 2015 Philippine National Games-Visayas leg didto sa Antique. (BANAT NEWS)