Kumentaryo ni Barrios wa'y pus

Nahimuot ako sa kumentaryo ni  Samahang Basketbol ng Pilipinas kun SBP executive director nga si Sonny Barrios nga ang mas taas nga preparasyon, gawas pa sa mga maayong players, maoy gikinahanglan sa Philippine team aron masakmit ang dungog sa basketball isip labing maayong team sa tibuok Asia.

Nahimuot ako kay nagpasabot kini nga wala gyud diay ni kalibotan si Barrios og basketball. Kung taas nga preparasyon ang atong gikinahanglan, nganong wala man niya badlunga ang mga coaching staff sa Gilas nga dili na lang kita mosalmot sa FIBA Asia Championship ug dili kita mosukol sa China kay kita pito lang ka semana nagpraktis unya ang China nga mas tag-as ug mas disiplinado pa kay kanato, nagpraktis nang daan pito ka buwan.

Misugyot unta siya nga pangandaman og dugay ang team aron dunay positibong resulta.

Kanang pito ka buwan nga praktis sa China posible pa ganing ilad kana ug dili tinuod. Kung moingon ang China upat na sila ka tuig silang nag-praktis mas motuo ako. Unya karon kay napilde man kita sa China nga mas taas og preparasyon, motiyabaw kita kay lutong Macau. Nakasabot ba kaha kini si Barrios sa iyang gipanulti o igo lang ni siya misipsip kang MVP--Manny V. Pangilinan.

Abi ninyo mga higala, motuo mo'g sa dili, ang ubang mga national teams ilabi na didto sa Europe, magpili dayon og players human sa Olympics. Upat ka tuig, nangandam na silang daan sa ilang mga players.

Matud pa ni Barrios iyang nakita nga ang dinali-dali nga giporma nga national team, maoy nagtapos sa 43 ka tuig nga pangandoy nga makaduwa kita sa Olympics dihang miyukbo ang Gilas Pilipinas sa host China sa iskor, 67-78 atol sa FIBA  Asia Championship.

Ang ubang mga suhito og basketball misaway kang Barrios sa social media tungod sa maong pag-angkon tungod kay sukad pa sa unang panahon nga nagkat-on pa og basketball ang Pilipinas, wala gyud kini tarung mga preparasyon tungod kay dili sama sa ubang nasud, kuwang kita sa suporta sa atong kagamhanan.

Matud pa ni Barriors nga ang Gilas nagpraktis lang og pito ka semana samtang ang China pito ka buwan nang andam alang sa FIBA gikan niadtong Septiyembre 23 ngadto sa Oktubre 3 didto sa Changsha sa Hunan, China.

Tungod niinii, misabot ra sab si Barrios kang Gilas coach Tab Baldwin.

Kalabot niini, dunay mitumaw nga taho nga dili na interesado ang Gilas nga mosalmot sa tulo ka laing qualifying tournaments sa Hulyo sunod tuig. Mao lagi dayon luod-luod.

Hinoon sab basin nakasabot na ang Gilas nga maglisud sila'g daog bisan asa sa tulo ka qualifying rounds ug lain na sab nga minilyon nga salapi ang mausik kay sa akong tan-aw mas lisud na kini kay sa FIBA Asia kay mga world teams na maoy ilang makontra.

Aron paghatag sa mga SPORTSgab readers og katin-awan kung nganong mas lisud kini sagubangon kay sa mga Asian teams tungod kay ang mosalmot niini pulos sab mga tang-an o lig-on nga teams.

Ang mosalmot sa qualifying round sa lain-laing FIBA  world divisions mao ang Angola,Tunisia ug Senegal sa AfroBasket (Africa), Canada, Mexico ug Puerto Rico sa 2015 FIBA Americas, France, Serbia, Greece, Italy ug Czech Republic sa EuroLeague (Europe) ug New Zealand sa FIBA-Oceania ug ang Philippines, Iran ug Japan sa FIBA Asia.

Adunay 12 ka basketball teams ang magsangka didto sa Rio de Janeiro ug siyam niini nailhan na samtang laing tulo pa ka luna ang ilogan.

Ang nakapanso na og tickets sa Olympics mao ang Team USA kinsa maoy World Cup champion, Argentina, Venezuela, Host Brazil, Lithuinia, Spain, ang champion sa Europe, Australia ang champion sa Oceania, China, ang champion sa FIBA Asia ug Nigeria, ang champion sa Africa.

MISCELLANEOUS. Yesterday was the 1st death anniversary of my mother-in-law the late Alejandra "Diday" Cao. Her children visited the graveyard in Ocana, Carcar City to sponsor a requiem mass. Those who went there were Nelly Po, Jane Po, Cecilia Senarlo, Consolacion Ramos, Guadalupe Malagar, Rita Ortega and grandchildren including Leslie Narvasa. Condolence to the family of Dante Ypil of Danao City who died last October 8, 2015. A nightly vigil is being held at the Ypils' residence. Interment will be announced later.