CEBU, Philippines – Habolan na sab og kolor nga ‘green’ nga maoy official color sa Milo, ang pipila ka bahin sa kadalanan sa siyudad sa Sugbo sa dihang kapin sa 23 mil ka mga runners ang magbaha aron mosalmot sa Cebu leg sa 39th edition sa National Milo Marathon sayo karong buntag nga manukad diha sa Cebu Normal University ug matapos sa Cebu City Sports Center.
Bisan og menos sa tres mil ka entrante kun itandi sa niapil sa miaging tuig, masaligon gihapon si Cebu leg organizer Ricky Ballesteros alang sa usa ka mabulukon ug malampuson nga karera karong tuiga.
Gawas sa mga pambato sa Sugbo, duna sa’y mga “out-of-towners” gikan sa Leyte, Dumaguete ug Manila ang makig-ginukdanay sa mga Sugbuanong runners sa tinguha nga makaangkon og luna sa National Finals nga gikatakda karong Disyembre didto sa Angeles City sa Pampanga sa labing unang higayon.
Gawas sa 21K nga adunay 690 ka mga partisipante, lain pang mga kategoriya mao ang 3K, 5K, ug 10K.
Gipasalig sab sa Nestle Philippines pinaagi ni Milo sports executive Andrew Neri ug RunRio ni Rio dela Cruz ang usa ka hapsay ug luwas nga lumba.
“We have a different route for the 3K and 5K division and for the 10K and 21K. There will be two finish lines to ensure the smooth flow of the race,” matud pa ni Neri.
“This is a collective effort, we unite for the Milo Marathon and treat it as our very own,” saysay ni Ballesteros. (BANAT NEWS)